ប៉េកាំង៖ នៅក្នុងកម្មវិធីបើកការប្រកួតកីឡាអូឡាំពិកនៅប្រទេសចិនដែលនឹងចាប់ផ្តើមនៅថ្ងៃទី៤ ខែកុម្ភៈខាងមុខនេះនឹងមានវត្តមានតារាសម្តែងលោក ឈិន ឡុង (Jackie Chan) ដែលនឹងកាន់ភ្លើងគប់អូឡាំពិកនៅលើមហាកំផែងចិន។

ក្រៅពី ឈិន ឡុង ក៏មានម្ចាស់មេដាយមាសកីឡាវាយកូនឃ្លីលើតុ Ma Long និង Wu Jingyu ដែលជាម្ចាស់មេដាយមាសពីរសម័យកាលក្នុងកីឡាតេក្វាន់ដូ ក៏នឹងត្រូវកាន់ភ្លើងគប់រត់តាមបណ្តោយផ្នែកBadaling នៃមហាកំផែងចិន។

លោក Jackie Chan វ័យ ៦៧ ឆ្នាំ ជាតារាភាពយន្តបែបកំប្លែងរបស់ហុងកុង ដែលត្រូវបានគេស្គាល់ថាជាអ្នកគាំទ្ររដ្ឋាភិបាលក្រុងប៉េកាំង។ បន្ទាប់ពីរត់ចេញពីBadaling នៃមហាកំផែងចិន ភ្លើងគប់នេះនឹងត្រូវបន្តទៅទីក្រុង Zhangjiakou ក្នុងខេត្ត Hebei ហើយចុងក្រោយនឹងមកអុជភ្លើងគប់នេះនៅពិធីបើកជាផ្លូវការនៅថ្ងៃសុក្រតែម្តង។

ដោយសារតែជំងឺរាតត្បាតកូវីដ-១៩ ការប្រកួតនឹងត្រូវធ្វើឡើងក្នុង "រង្វង់បិទជិត" ដោយឱ្យអ្នកចូលរួមក្នុងអូឡាំពិកនៅឆ្ងាយពីសាធារណៈដើម្បីការពារហានិភ័យ៕